Aprelin 3-də Heydər Əliyev Mərkəzində “III Beynəlxalq Autizm ABA Azərbaycan” konfransının yekuna həsr olunan konsert keçirilib.
Konsertdə autizmli gənclər və tanınmış incəsənət ustaları çıxış ediblər.
İlk çıxışçı-autizmli gənc piano ifaçısı, Azərbaycan Dövlət Mədəniyyət və İncəsənət Universitetinin (ADMİU) Musiqi sənəti fakültəsi Musiqi müəllimliyi üzrə təhsil alan 4-cü kurs tələbəsi Əlisahib Bayramov səhnəyə dəvət edilməzdən əvvəl onun konsertə necə hazırlaşdığını tamaşaçılara çatdırmaq üçün videoçarx göstərilib. Bildirilib ki, Əlisahib Bayramov ən böyük dəstəyi ailəsindən alıb. Anası, atası və qardaşı ona çox inanırlar. Amma bu sahədə pianoçuya ikinci böyük dəstəyi onun müəllimi, ADMİU-nun “İnstrumental ifaçılıq” kafedrasının baş müəllimi, beynəlxalq müsabiqələr laureatı, Qran-Pri mükafatçısı Humay Mansurova göstərib. Bildirilib ki, onun ən çox sevdiyi əsərlərdən biri Müslüm Maqomayevin “Dəniz” mahnısıdır. Məhz dalğaların xışıltısında Əlisahib qurduğu dünyada rahatlıq tapır, öz arzularına qovuşur.
Sonra Əlisahib Bayramov və Humay Mansurova pianoda Tofiq Quliyevin “Sevgi” valsını ifa ediblər. Həmçinin, Ə.Bayramov L.V.Bethovenin “Moonlight” sonatasını da ifa edib.
Qeyd edək ki, Əlisahib Bayramov respublika üzrə yeganə gənc autizimli ifaçıdır.
Gecədə Azərbaycanın fərqli balalarını öz himayəsində saxlayan Heydər Əliyev Fondunun rolu xüsusi vurğulanıb. Bildirilib ki, Leyla Əliyeva yazdığı şeirlərilə hər zaman insanların qəlbinə yol tapır. O, istedadlı insanlara olan xüsusi münasibətilə seçilir. Buna görə də proqramda Leyla Əliyevanın yaradıcılığını göz önünə gətirmək üçün səhnəyə qiraətçi Xəzər Süleymanlı dəvət olunub. O, Eldar Mansurovun “Elegiya”sının sədaları altında Leyla Əliyevanın şeirlərindən birini oxuyub.
Proqramın davamında Şəhriyar İmanov tarda Azər Rzayevin “Düşüncə” əsərini, Ceyla Seyidova skripkada Rolf Lövlandın “Secret Garden” kompozisiyasını ifa edib. Ardınca Fərid Əliyev Müslüm Maqomayevin “Dəniz” mahnısını səsləndirib. Gecədə Faiq Sücəddinov “Vətən balladası”nı, Fidan Hacıyeva “Azərbaycan”, Tünzalə Ağayeva autizmli şəxslərdən bəhs edən “Fərqliyəm” mahnısını oxuyub.
İfalar zamanı səhnədə kompozisiyalara və mövzuya uyğun proyeksiya olunan videogörüntülər gecəyə xüsusi bir ab-hava gətirib.
Qeyd edək ki, aprelin 2-3-də Heydər Əliyev Fondu, Heydər Əliyev Mərkəzi, Səhiyyə Nazirliyi, Təhsil Nazirliyi, Əmək və Əhalinin Sosial Müdafiəsi Nazirliyi, Ailə, Qadın, Uşaq problemləri üzrə Dövlət Agentliyi, İcbari Tibbi Sığorta üzrə Dövlət Agentliyinin, “Regional İnkişaf” İctimai Birliyi, “Birgə və Sağlam” İctimai Birliyinin təşkilatçılığı ilə keçirilən ikigünlük konfransda məqsəd autizm sindromunun erkən aşkarlaması, erkən müdaxilə üzrə xidmətlər, eləcə də autizmli şəxslərin ömür boyu təhsil və məşğulluğunun təmin olunmasında inklüziv və multidisiplinar yanaşmalara əsaslanan beynəlxalq təcrübələrin öyrənilməsi, ictimaiyyətin diqqətini bu şəxslərin problemlərinə yönəltmək, autizmli insanların həyat keyfiyyətinin yaxşılaşdırılmasına kömək etmək olub.